jawoniɣ̌ i bi yi šum naša rang

jawoniɣ̌ i bi yi šum naša rang

ki wizit eṣ̌ ẓ̌i wocen eṣ̌ kutruma rang

ske čežm eṣ̌ yem pirvit yi parda rang

xur eṣ̌ be suðuyd ẓ̌i laila rang

sekr ret ɣ̌irekt sof yem škinda rang

peðras wuz putov yem xuda rang

pečekt et branje bidona rang

skem ti baar eṣ̌ wezim yi qergha rang

ya rori tu ẓ̌i lafoša rang

wuðg eṣ̌ θav yem srung e pilta rang 

tuuy em kert ẓ̌ʉ jon i de larza rang

yem yarki bi ror et bi sumba rang

palm em tayin ki sof namona rang

tuk em tayin ki čiin e dumba rang

ɣ̌iṣ̌ i šiɣ̌ard yem diš antina rang

ɣ̌aṣ̌ em tayin ki ðarte khilta rang

kaak em tayin ki sof čat klaa rang

x̌ʉ ruy eṣ̌ buth yem kona kafša rang

ẓ̌i eṣ̌ trak di tu yi khičqa rang

yark em ki x̌at wit it ẓ̌i šanta rang

ki peðmeṣ̌ eṣ̌ gulmit e dema rang

ɣ̌aš i ki kert wuz piš pe tumxa rang

tuuy en xekt ko zaqiq da ẓ̌ʉ eṣ̌ be woč

ta mex may kat maze x̌ʉ basta rang

tow reṣ̌ suðuy em wuz yi baqla rang

baf et ki makt wuz em yi kufa rang

sekt et ki wikt x̌ʉ šač er maz me kat

de waxt e šulbut em wuz yi kilya rang

maz ep ne got vul eṣ̌ be maz če ne sar

klaa isht tev het nash mep ya savza rang

ti sapt et zib et zinat i, ti Bulbul

tra sup may di maze ya xista rang