Čem ti Č̣ezme Piyolaven

Čem ti č̣ezme piyolaven pevmeṣ̌ ti išqe šarob
Narma zaqiq jald me reč̣
Har lavzi če noxt per noxt joymeṣ̌ ya x̌ʉšruy  kitob
Narma zaqiq jald me reč̣

wuðg  bor yi loy ẓ̌ʉ č̣ezmiṣ̌ti ṣ̌okenden yem x̌ʉ  x̌ʉmor
Č̣ir zi woč ẓ̌ʉ jone yor
Yi loy ko zaq ne nezda dem ẓ̌ʉ purut biniqob
Narma zaqiq jald me reč̣

Ẓ̌ʉ make filet wudretk čermeṣ̌ yo rang da wutiš
x̌ateṣ̌ ẓ̌ʉ θwake diš
Me muṣ̌ x̌ʉ ruy da petek ẓ̌ʉ č̣ezemveṣ̌ go bitob
Narma zaqiq jald me reč̣

Bediljam to tayinem naṣ̌t ẓ̌ʉ puzuve rimrim
Ẓ̌ʉ xiyole tore sim
Če qowləken yi ɣarib ti winge haten kabob
Narma zaqiq jald me reč̣

Ra ẓ̌ʉ qoq durum tayin tu yem ẓ̌ʉ wiron puzuv
Ko zaq woz yem daṣ̌te nuv
Tem x̌ʉ pič̣ae muren go biyobone sirob
Narma zaqiq jald me reč̣

Kertem nihol yi qalam skem puzuve woðe sam
ɣ̌ate mar sek č̣ezme nam
Dašti če x̌etk guliston wuz zaq vulem ya gulob
Narma zaqiq jald me reč̣

x̌ʉ č̣ezmep zumavem yem x̌ʉ  puzuv čereng gom
x̌ekti maze nohorom
Niv de x̌ʉ husne tobon yi loy čar yowe kabob
Narma zaqiq jald me reč̣

Də Bulbulle duruneṣ̌ če bayd x̌and yemi kuy?
Yi loy yo sado kuṣ̌ui
Yi x̌ʉšruy  sozi ɣ̌iretk woz skem ẓ̌ʉ ruhe rabob
Narma zaqiq jald me reč̣

- Nazir Ahmad Bulbul