Šum Yi Kəsali

Šum yi kəsali pərvekt ʦereng gom
Dem ẓ̌ʉ jigari pərvekt ʦereng gom

Sof bi xbari pərvekt ʦereng gom
Išqe asari pərvekt ʦereng gom

Ne puzuv ne ẓ̌ʉ jigari pə ẓ̌ʉ gap
Ne xyol ne ẓ̌ʉ nazari pə ẓ̌ʉ gap

Yi zabon tu kertəṣ̌ ẓ̌ʉ darde qəsa
Nivi nast ya nobowar bə pə ẓ̌ʉ gap

Sof nobowari pərvekt ʦereng gom
Dem ẓ̌ʉ jigari pərvekt ʦereng gom

Ne duṣ̌tov neyi dawo maẓ̌er bukor
Ne timor neyi duo maẓ̌er bukor

Maẓ̌er ki vite yem ti husne dowlat
Ne bihišt neyi dunyo maẓ̌er bukor

Išqe pəsari pərvekt ʦereng gom
Dem ẓ̌ʉ jigari pərvekt ʦereng gom

Kuyeš x̌and ki piri ʣaxmi ti jigar
Kuyeš x̌and nirip qalamni yem asar

Nodon tabibet mulover ceng x̌anem
Səkmaẓ̌i pərvetk ti č̣eẓ̌me nazar

Yem ti nazari pərvekt ʦereng gom
Dem ẓ̌ʉ jigari pərvekt ʦereng gom

 - Nazir Ahmad Bulbul