Bidɣ̌anz

hʉmit mǝborak bidɣ̌anz,
yem ṣ̌eɣ̌d səfare towre

tate pʉzʉveṣ̌ niv nʉwd,
nane jigar towre

ajabi rasme dʉnyo,
tat nani heyron

x̌ateṣ̌ sek x̌ʉ dast caren,
x̌ʉ dʉṣ̌ta wiron

ðeɣ̌de nasibeṣ̌ disen,
boɣe digare yowre

hʉmit mǝborak bidɣ̌anz,
yem ṣ̌eɣ̌d səfare towre

yem sirsilaet mʉṣ̌tibar,
yem haret yem šan

x̌ʉb tiyoriɣ̌et nek x̌etk,
zevvetket x̌ʉ tan

zavd zindagi tin Xʉðoy,
rand ya hunare towre

hʉmit mǝborak bidɣ̌anz,
yem ṣ̌eɣ̌d səfare towre

ceng pʉtrʉmem yem tufon,
niv wuz da x̌ʉ dil

nʉwma ki carem xʉši,
vitki ɣa mʉskil

xʉšem ki wuðgeṣ̌ gotem,
soyae sare tore

hʉmit mǝborak bidɣ̌anz,
yem ṣ̌eɣ̌d səfare towre

oxir bu roret tiwetk,
meymon da ẓ̌ʉ x̌ʉn

ceng cem x̌ʉ baren carem,
niv towe ruwun

dʉnyowe rasmi zereng,
rʉmʉṣ̌ ẓ̌ʉ bare bore

hʉmit mǝborak bidɣ̌anz,
yem ṣ̌eɣ̌d səfare towre

nan ta x̌ʉ yuk yow diyetk,
nʉwdet yemeṣ̌ x̌and

skem rasme dʉnyo me nʉw,
x̌ʉ nane jon kand

x̌ʉ yoze yaṣ̌ke lecer,
dem ẓ̌ʉ nezare bore

hʉmit mǝborak bidɣ̌anz,
yem ṣ̌eɣ̌d səfare towre

tat waqte kerti jiða,
ðeɣ̌de ca nanen

wuðg vite yow jone pak,
jəða ca tanen

de nʉwnene x̌and ki rand,
Xʉðoy  sabare towre

hʉmit mǝborak bidɣ̌anz,
yem ṣ̌eɣ̌d səfare towre

ðasteṣ̌ ɣ̌irtǝvdet xandeṣ̌
x̌aṣ̌ x̌ʉ domoder

carmeṣ̌ x̌ʉ xune ẓ̌ʉmak,
niv hawola tower

tʉm tangem x̌etk yem x̌ʉ xun,
ðetkem sahar towre

hʉmit mǝborak bidɣ̌anz,
yem ṣ̌eɣ̌d səfare towre

čalgeneṣ̌ tor yem duwo,
niv yem ti tat nan

hamiṣ̌ cə ton hʉmit ðir,
yem ɣamve tufon

bihiṣ̌t rang gox̌t Xʉðoy,
yem xalge bare towre

hʉmit mǝborak bidɣ̌anz,
yem ṣ̌eɣ̌d səfare towre