Magam ẓ̌ʉ Yor i Biperwo

Neṣ̌ kʉṣ̌yd ẓ̌ʉn,
neṣ̌ rand sədo čizər ko vitk biwofo

Wʉz em naγ̌d rore yowe ho,
Magam ẓ̌ʉ yor i biperwo

Dišmeṣ̌ yowe x̌ʉ jon e jon,

Dišmeṣ̌ yo x̌ʉ boγbon

Dišmeṣ̌ x̌ʉ derde yo dermon,

Magam ẓ̌ʉ yor i biperwo

Ti hijr en wuδg ẓ̌ʉ serk i ṣ̌ʉw,

Wʉδg yem ẓ̌ʉ derdi bidorʉw

Išq e rexniγ̌ ẓ̌ʉ yašceṣ̌ θʉw,

Magam ẓ̌ʉ yor i biperwo

X̌ʉ gulem nost de gulve γul,

Neyi yow soxt neyi yow vul

ɣam e dʉnyo cʉmreṣ̌ maž čul,

Magam ẓ̌ʉ yor i biperwo

Ce towen beγer safar i muškil,

Pe ṭʉmṭangiγ̌ yem ẓ̌ʉ dil

Neyeṣ̌ dišem komeri manʒil,

Magam ẓ̌ʉ yor i biperwo

X̌at em ki č̣awem skamey xotir

Yowe xizmater em wuz hozir

Came hijren vitkem šoyir,

Magam ẓ̌ʉ yor i biperwo

Cʉmereṣ̌ kafem cʉmreṣ̌ nʉwem,

Koyer x̌anem koye qʉwem

Dame γameṣ̌ x̌ate θʉwem,

Magam ẓ̌ʉ yor i biperwo

Ti ošhiqi mar vetk kesel,

Wʉδgem rʉmeṣ̌tk ilm ət amal

Saif dardi dame γazal,

Magam ẓ̌ʉ yor i biperwo