Špʉn

"Mari yem faxr x̌ikem wuz,
špʉnem tu špʉnem tey
Kʉli imone zikem wuz,
špʉnem tu špʉnem tey"

"Tremis ẓ̌ʉn mol holišt tu,
nivem da ilme helga wuz
khayolet fikreveš pʉyem,
špʉnem tu špʉnem tey"

"Qlame bandi dem ẓ̌ʉ ðast,
nʉvori žʉ kitob ẓ̌ʉnen
ɣ̌itetk da ilme injuyem,
špʉnem tu špʉnem tey"

"Ce dišne moðneṣ̌ durzem
hamiš yem aqle mska wuz
x̌ʉ fikre žaržeš ṣ̌ingṣ̌uyem
špʉnem tu špʉnem tey"

"Kuli dunyo wi spo midoon,
də har jayen niyeng yezi
Trə har gozet trə har ruyen,
špʉnem tu špʉnem tey"

"Špʉnem tey x̌ʉ imomen,
špʉnem nʉret Quronen
De waxt ce kʉx̌ten x̌ʉšruyem,
špʉnem tu špʉnem tey"

"Ye x̌ik tuwet če tu bizik,
ti sohibe nazari yem
Yi qur x̌at pers ki kuyem,
špʉnem tu špʉnem tey"

 - Nazir Ahmad Bulbul