ce osmonen yi mowjin,
wezde de ẓ̌ʉ baxte zamin
xušruy sof murɣe zarin,
ẓ̌ʉ č̣eẓ̌me x̌at sad ofrin
ɣ̌eṣ̌te x̌e kerti maẓ̌e tayin,
vite da ẓ̌ʉ dil šeh nēsin
sar vite mar išqe wiyin,
ẓ̌ʉ ɣamištev vite tapin
wiron ẓ̌ʉ puzuve zemin,
vite maẓ̌er banafšayin
ya banafšayi mar širin,
ẓ̌ʉ dur ẓ̌ʉ jon ẓ̌ʉ nozemin
skem čarmeṣ̌ wez wuɣeṣ̌ wuɣeṣ̌,
ber xateṣ̌ go murdume heṣ̌
kuyi digar ki kuyi xeṣ̌,
har yiwi nek ti setooweṣ̌
diyveṣ̌ ẓ̌ʉ puzuve jumbeṣ̌,
wezniṣ̌ ẓ̌ʉ armoniṣ̌t nereṣ̌
ẓ̌ʉ jon nix̌ingri zi be beṣ̌,
xušruy ya ti č̣eẓ̌me moleṣ̌
kuxter may kand, tiloweṣ̌ teṣ̌,
cem bad nazar dunyowen weṣ̌
č̣eẓ̌mep tu woc x̌ate tayin,
ẓ̌ʉ dur ẓ̌ʉ jon ẓ̌ʉ nozemin
windem ki wezde ɣoz ɣoz,
vite ẓ̌ʉ jon yower niyoz
yo tuk sak tapke poyindoz,
ɣ̌ate da ẓ̌ʉ puzuve goz
skem ẓ̌ʉ puzuve tuke soz,
ɣ̌irde keẓ̌ek ya ẓ̌ʉ raqoz
da gozi kert x̌at daroz,
xušbuwet rang vite fizoz
vite ẓ̌ʉ armonver oɣoz,
kerti ẓ̌ʉ soz yoz bayoz
ẓ̌ʉ dile x̌at sad ofirin,
ẓ̌ʉ dur ẓ̌ʉ jon ẓ̌ʉ nozemin
yow winger č̣eẓ̌miṣ̌t ẓ̌ʉn zirič,
yowi ki nast mari trič
yiloy da dil yitoly tarvič,
tra pudi dil zunen kaṣ̌ič
sof no horom zi bilbilč,
sof noqeror zi keṣ̌kirič
joni nozuk sof pistilič,
ska husne tov wuz mindlič
Bulbul tin pilpilič,
dami čereng ti isqe wič
nix̌indep jon yower oyin,
ẓ̌ʉ dur ẓ̌ʉ jon ẓ̌ʉ nozemin