Noyoft Ya Ẓ̌ʉ Kuhe Ambar

noyoft ya ẓ̌ʉ kuhe ambar,
ya ẓ̌ʉ jone yori wezɡ

da vuli mast yem ẓ̌ʉ jiɡar,
ya ẓ̌ʉ jone yori wezɡ

yi bahorve sepreẓ̌ʉvit,
yem ẓ̌ʉ pʉzʉve wučaq

ɣətetki meymon dem ẓ̌ʉ bar,
ya ẓ̌ʉ jone yori wezɡ

ti hʉsne qəsameṣ̌ ki kert,
kandiṣ̌ gulob skem ẓ̌ʉ sar

wuðɡi x̌at hyron dem ẓ̌ʉ bar,
ya ẓ̌ʉ jone yori wezɡ

carneš ləmaner ti qəsa,
yem sepreɣ̌ist dem čaman

ki yo ranɡet vuli diɡar,
ya ẓ̌ʉ jone yori wezɡ 

yem sitoriṣ̌t be ti winger,
rore kenev če ɣ̌etetk

x̌aker ti didor yi nəzar,
ya ẓ̌ʉ jone yori wezɡ

če šarmeneṣ̌ mʉst ya ẓ̌ʉmak,
niv yem x̌ʉ roy da wʉtiṣ̌

dem ti pʉrʉti šarmesar,
ya ẓ̌ʉ jone yori wezɡ  

biqərori yir ɣ̌itaker,
yem ti winger ye ẓ̌ʉ dʉr

wuðɡi ke x̌etk jalde sahar,
ya ẓ̌ʉ jone yori wezɡ

ti mʉborak bodri če wezɡ,
ye Bʉlbʉl yem banafša

mʉẓ̌dayi rex̌k da kuhe sar,
ya ẓ̌ʉ jone yori wezɡ